عايز ترتبط بواحدة ومحتار وعايش في فراغ لسة في الكلية ولا اتخرجت طب تعالى

ازيكوا يا شباب

في الحقيقة أنا لقيت موضوع مفيد لكم

شاب بيسأل انا عايش في فراغ وانا في الكلية أعمل إيه؟؟

أو انا اتخرجت ومش عارف إيه الخطوات اللي أقوم بيها دلوقتي ولا عارف هدفي

سؤال تاني بيتكرر برضه أنا عايز أرتبط بواحدة أعمل إيه؟؟؟


إيه اللي أقدر أعمله عشان الارتباط ده ما يفشلش قبل ما يبدأ؟؟



طبعا زي مانتو شايفين كده الموضوع انقسم لاتنين

الارتباط والفراغ

ولأن ليهم علاقة ببعض هتعرفوها من خلال الموضوع

وأتمنى فعلا إنه يفيدهم بجد

في البداية لازم نعرف إن الموضوع ده أولا وأخيرا هو تفكير بالعقل أكثر من القلب

وده برضه هتعرفوه من خلال متابعة الموضوع



نبدأ أولا بالجزء الأول من موضوعنا
وهو

الفراغ وخطوات المستقبل الجيد




الخطوات اللي المفروض يمشي عليها كل شاب واللي من المفضل تكون من أيام الكلية

عشان بعد كده تساعده في مستقبله

كتير من الشباب بيكون عايش في فترة الكلية أو من بداية تانية ثانوي لحد الكلية

في حالة من اللا وعي

يعني إيه؟؟

يعني عادي الأهل بيصرفوا عليه وهو مش شايل هم حاجة وعايش الدنيا بالطول وبالعرض

وفجأة بعد ما يتخرج يتصدم بالواقع المرير

أنا آقعد على الرصيف ليه؟؟

ما فيه ناس زيي ومتخرجين معايا واشتغلوا

إشمعنى أنا؟؟

وممكن كمان الشباب ده مايفوقش بعد التخرج
ده ممكن يوصل لسن 28 و 30 ولسة للأسف ما فاقش

غير كده كمان في الكارثة

بعض الشباب مش بس عايشين في لا وعي

لا وكمان بيشربوا مخدرات (بيحششوا يعني وبانجو وكلام من ده)

يعني ولا بيشتغلوا ولا فارق معاهم

وبعضهم ييجي وقت معين تلاقيهم مزهولين (وقت مايلاقوا حب حقيقي صادفهم)

أنا عملت إيه في دنيتي؟؟

أنا ضيعت العمر ده كله من غير أي فايدة؟؟

يا ترى انا هقدر أتجوز ازاي دلوقتي؟؟

هقول لأهلها إيه وهتجوز منين وازاي؟؟

ولو الشاب مش فارق معاه حاجة طول حياته دي مأساه لوحدها
مش هنتكلم فيها دلوقتي

دلوقتي الموضوع ده للشباب اللي عنده استعداد يفوق

عنده استعداد يغير حياته عشان وقت مايحب يرتبط أو يتجوز

يلاقي نفسه واقف ثابت وواثق من نفسه

للشباب اللي عنده إرادة لكن مش عارف يوجهها ازاي

لسة ماعندوش إرادة أو ممكن نقول مافكرش في الموضوع غير قليل
وعايز حد ينصحه أو يوجهه


الناس اللي لسة في الكلية (أو اللي اتخرجوا)

حاسين بفراغ وقت الأجازات أو وقت الفراغ؟؟

الحاجات اللي ممكن تفيدكوا كويس جدا كالتالي


أهم حاجة يا جماعة الكورسات،
وماحدش ييجي يقولي لا انا الانجليزي بتاعي كويس مش محتاج كورس ولا بتاع
هقولك طيب تمام الانجليزي كويس ادخل أي مركز معتمد
وروح اختبر نفسك انت في المستوى الكام
وطلع منهم شهادة على الأقل بالمستوى اللي انت فيه لو مش عايز تزيد عنه
وده لأن انتوا عارفين بلد الشهادات ومش بس مصر،
حتى لو فكرت تسافر برة لازم يكون فيه إثبات على قدراتك،
إيه اللي هيثبت للي هتعمل معاه الإنترفيو انك فعلا كويس
هو مش هيضيع وقته في المقابلة عشان يعرف انت فعلا فاهم انجليزي وللا لا،
لازم يتأكد من شهادة تثبت ده وبعدها يبقى يعمل معاك المقابلة،
وطبعا ده بينطبق على ناس معينة مش كل الشركات بتعمل كده

طبعا غير كورسات اللغة كمان كورسات تدعم الدراسة اللي انت بتاخدها

لو انت مقتدر ماديا ممكن تاخد كورسات كويسة جدا تفيدك لو فرضنا انك في كلية تجارة

فيه كورسات جامدة جدا في الجامعة الأمريكية
مجرد ماتكون معاك أكيد هتشتغل في مكان كويس إن شاء الله

زي مثلا كورس الـ MAC
Modern Accounting

كلية هندسة ليها برضه كورسات خاصة بيها ودي ليها منح

كلية حاسبات ليها تدريب كل أجازة في شركات كبيرة وجميلة جدا
لو حد احتاجها يقولي وانا اشوفله إيميلات الشركات دي

وغير الكليات دي فيه فرص كتير جدا في الكورسات

*********

ولو انت مش مقتدر ماديا فيه منح دراسية

زي منحة ITI لو تسمعوا عنها للخريجين التسع شهور وماتدفعش فيها ولا مليم

بس تمضي على إقرار بـ 15000 جنيه لو سيبتها في نصها وده لما تخلصها بيتقطع

ودي منحة في جميع تخصصات الكمبيوتر حسب ما تختار انت المجال اللي تحبه

منحة ICDL من وزارة الاتصالات ودي مش شرط تكونوا اتخرجتوا مدتها 3 شهور
أو ممكن تسأل في أي مركز كمبيوتر معروف في محافظتك وتسأل عندهم منحة الـ ICDL

بس يستحسن تشترك في الموقع وتختار الشركة اللي قريبة منك

هيجيبولك رقم تليفونها تتصل بيهم وتروح

ودي بتكون بمبلغ تأمين 120 جنيه تاخدهم لما تيجي تاخد الشهادة بتاعت الـ ICDL

حد ييجي يسألني مثلا

مانا أعد مرتاح في بيتنا إيه يجبرني أتعب نفسي في دراسة تانية؟؟

أرد عليك بقى بالجزء التاني من الموضوع

كل واحد من الشباب لازم يكون عنده عزيمة إنه يعمل حاجة في حياته

عشان مستقبله، عشان لما يفكر يرتبط أو يتجوز،
عشان ما يبقاش زي اللي قاعدين من غير شغل ولا هدف في الحياة

كل واحد يحاول يعمل اللي عليه وإن شاء الله ربنا هيوفقه لما فيه الخير




الجزء التاني من الموضوع

الارتباط والوقت المناسب وبعض النصائح

كتير تساؤلات من الشباب

أنا نفسي ارتبط بواحدة أعمل ايه؟؟ أقولها؟؟ هتستناني؟؟

تعالوا نفكر بعقلنا قبل قلبنا في الموضوع ده

واحد دلوقتي لسة شاب في الكلية

أو اتخرج خلاص

اللي بيفكر يرتبط مش لازم يكون أد الفكرة دي الأول؟؟

السيناريو اللي بيحصل كالتالي



واحد يعجب بواحدة يقولها أنا عايز ارتبط بيكي.. شوية بعد سنة وللا اتنين

يكتشف انه مش جاهز دلوقتي وإن اللي كان مخططله اتلخبط

يروح يقولها معلش احنا لازم نسيب بعض (أصله طيب وابن حلال مش عايز يظلمها معاه)

أمال هو عمل إيه من الأول ما هو كده ظلمها

هييجي واحد حسن النية يقولي لا

أنا ما ظلمتهاش، انا لما طلبت الارتباط كان هيبقى فيه فرصة عمل كويسة
كنت هقدر منها أعمل مبلغ وكنت هـ وكنت هـ..

بس في الآخر ده ما حصلش

يبقى لازم قبل أي حاجة تكون حاطط رجلين على خطوات ثابتة ومعروفة
مش حاجة مستقبلية باني عليها حياتك

قبل ما تفكر في الارتباط فكر الأول لو الحاجة اللي انت متصور انها هتحصل دي ما حصلتش

هل هتقدر تعمل حاجة؟؟ وقت ما تيجي ترتبط هل وقتها تقدر تتقدم لأهلها؟؟

مش هتقدر تتقدم لأهلها وتشرح ظروفك وتلاقي قبول يبقى خلاص بلاش من الأول

ليه تظلمها وتظلم نفسك؟؟

سيناريو تاني بدل ما هو يقولها اسيبك عشان حرام أعلقك معايا

واحد يلاقيها اتخطبت بعد ارتباط كام سنة وحب سنين ومش عارفة إيه

طيب ماهو مش كل البنات هتقدر تستنى

ولو قولنا إن البنت كويسة (أهلها عايزين مصلحتها من وجهة نظرهم مش هيخلوها تستنى)

مش هقول لازم يكون معاك شبكة بمش عارفة كام ولا شقة تمليك ولا الكلام ده

بس على الأقل يكون معاك مبلغ تجيب بيه دبل

وتكون في شغل ثابت مرتبه ممكن يأجر شقة ويعيشها كويس مش على الرصيف

الشغل ده بقى بالمرتب ده ييجي منييييييين؟؟


من الحاجات اللي قولناها في الأول.. إنك تكون متميز عن باقي زمايلك بالكورسات اللي خدتها

إنك تكون طموح وعندك هدف في الحياة ماشي وراه عشان تحققه

أنا مش بتكلم كلام في الهوا

أنا دلوقتي مكتوب كتابي وفي البداية خالص لما جوزي كان حب يرتبط بية اتقدم لأهلي

أينعم الموضوع كان بالنسبة لهم نوعا ما مش مقنع (عايزين واحد جاهز من مجاميعه)

لكن والله لما ربنا بيريد كل حاجة بتتقدر لما فيه الخير


يعني مش حاجة مستحيلة ولا حاجة

يبقى هنا أهم خطوة لما تحب ترتبط بواحدة هي إيه؟؟

تشوف الأول ينفع تتقدم لأهلها وللا لا

مش هينفع بأي شكل خلاص ما تتعبش نفسك وتتعبها معاك

تطلب منها ارتباط وبعد كده ترجع تقولها اسيبك عشان ماعلقكيش
مانت علقتها خلاص تسيبها بعد إيه؟؟

ده بالنسبة لتعمل إيه قبل ما تفكر في الارتباط

طيب انت دلوقتي ما فكرتش لسة في الارتباط

تعمل إيه بقى عشان لما تفكر ترتبط تكون قدها؟؟

وده إجابته الجزء الأول من الموضوع
واللي كنا بنتكلم فيه عن إن المفروض إنك تمشي بخطوات طموحة في مستقبلك
عشان وقت ماتفكر في الارتباط تلاقي نفسك جاهز ليه رسمي
مش ترتبط في الضلمة وموضوع يفشل لأي سبب من الأسباب

وماحدش يقولي لا مش في الضلمة دانا أهلي عارفين

طيب أهلها هي عارفين؟؟ أبوها وأمها؟؟ وللا واحد بس فيهم؟؟ وللا ولا واحد؟؟ لا؟؟
يبقى في الضلمة مش في النور

أتمنى إن الموضوع ده يفيدكوا حقيقي

في رعاية الله