يا شباب المعاكسات عليكم حق ولازم تاخدوها

المعاكسة واجب قومي وحق اتجاه اي بنت نازلة الشارع وتاعبة نفسها ومتشيكه وحاطة ميكب ونازلة تقول للأرض اتهدي ما عليكي ادي ... عايزين ايه من الشباب يعني ... مش لازم يشجعوا المنتج المحلي... وكمان لما البنت دي تتعاكس والشباب يقرفها في الشارع اكيد هاتتربى وهاتتعلم الادب وتنزل الشارع بعد كده محترمة .... ماهى لو محترمة والله ما كانش حد قرب ناحيتها .

بس في مشكلة ...

البنت اللي لبسها كويس ولابسة اسدال كمان او خمار بتتعاكس ليه.؟؟؟.... ايه اللي بتتعاكس ليه ... اكيد ماشية تتمايع وتضحك في الشارع وحاطة ميكب اد كده ....لازم تتربى بردو وتنزل الشارع محترمه ... ساكتة ولا تنطق من اساسه ... مش بقولكم واجب قومي ....

طب واللي ماشية لابسه محترم ولا حاطة ميكب ولا غيره وماشية في حالها لا بتضحك ولا بتتمايع ماشية في حالها ... ...لأه بقى ما هي نازلة الشارع وحدها وقاصدة تتعاكس ايه اللي منزلها الشارع وحدها وهي عارفة الشوارع بقت عاملة ازاي ... ماهي لو محترمة بجد كانت نزلت مع باباها ولا اخوها ولا خطيبها حتى ... دي عايزة تعمل محترمة وتضحك عالشباب وتجيب عريس ...

طب واللي نازلة مع اخوها ولا خطيبها ولا حتى جوزها (مش نازلة وحدها اهو) ويطلع لها واحد من ورا خطيبها ولا اخوها بيبصبص ليها كده من ورا ظهر الراجل الغلبان وعمال يشاور ويعمل حركات ويقرفها ... ... يا سلاااااااااااام ومين قاللك ان ده خطيبها ولا اخوها .. تلاقيها الواد اللي ماشية معاه ماهو لو كان خطيبها كان قعد يشوفها في بيتهم ويبطلوا صرمحة في الشوارع ... مش بقولكم واجب قومي علشان البلد والله....


طب واللي واقفه في البلكونه الغلبانه بتنشر ولا بتجيب حاجة بالسبت بيطلع لها ميت واحد من الشارع راصدينها واللي يعاكس واللي يشاور.. الله ما هي قاصداها اهي وطالعة البلكونة علشان الناس تشوفها وتتعاكس .. هي اللي عاوزة تتعاكس من الاساس ..... هي ايه اللي طلعها البلكونة من الاساس .. تنشر .. هههه دي تلاكيك يا عمنا ... دي عاوزة تتعاكس ... ماهى لو محترمة والله ما كانش حد هيقرب ناحيتها ...

طب واللي قاعدة في بيتها يا ناس .. ويطلعلها من الشباك اللي عمال يبص ويبحلق فيها ويعاكسها ... شوفت اديك قلت بنفسك ياعم ... هيا اللي فاتحة الشباك علشان الراجل ده يشوفها ويعاكسها ... وتلاقيها كانت بتتمخطر قدامه رايحة جاية ومتشيكه علشان يشوفها ويعاكسها .. هي لو محترمة تفضل في بيتها وتقفل الشبابيك والبلكونات والبيبان كلها وتقعد تحت السرير كمان علشان تبقى بنت محترمة بصحيح ومحدش يشوفها خااااااالص وتدفن نفسها بالمرة...


على فكرة انا بوضح لكم ان اللى بيعاكس بيحلل تصرفاته على انه صح وبيقنع نفسه بكدة بس هى غلط مية فى المية مش عايزه اى بنت تزعل منى انا طبعا معاكم يا بنات و كمان يعنى الشباب ما يسقوش فيها ده كله كلام غلط